25

أنا مش اخوانجيه....!!!

الثلاثاء، 26 يونيو 2012

 
من امبارح وانا قاعده أفكر هكتب أيه انهارده قعدت أفكر وأفكر وأفكر وانا بفكر بقى حضرني عدت مواقف كلها عن نفس الشخص ونفس الموضوع ((د/محمد مرسي)) بغض النظر عن كوني مش حباااااه وعني اني مبحبش الأخوان بوجه عام ولسه بردو مصره على انهم باعو القضيه وحطو ايديهم في أيدين العسكر ونسيو دم الشهداء وأنهم اخد مقابل ده مجلس الشعب وانهم بطلو ينزل التحرير لما خلصت مصلحتهم ولما رجعت تانى المصلحه رجعو تانى التحرير وعارفه ومتاكده انهم جماعه انانيه وعندها حب لذتها وكل همها توصل للكرسي وبردو كرهتهم أكتر لما قولنا هنعمل مجلس رئاسي رفضوا وقالو احنا مكملين انتخابات للنهايه حسيت وشهم اتكشف أوى والقناع اللى كانوا لبسينوا وقع وبانو على حقيقتهم وبردو مش خايل عليا انه محمد مرسي انشق عن الجماعه وقد استقالته من الجماعه والحزب بس ماشي يا سيدي هعديها المره دي .....برغم كل اللى فات ده أنا فرحت لما كسب مش عشان هو كسب لاء ده عشان بس شفيق مخدهاش حسيت أن تعبنا مرحش هدر وأن الشهداء كده مش هيتفو علينا ^_^
عماله أرغي بقال ساعه ده أنا ممله ^_^
بغض النظر بقى عن كل الرغي اللى فات ده انا زعلانه ومدايقه جدا ومبوزه كمان V_V
لو جه أى حد أيا كان هو مين وأتكلم مع بابا الله يرحمه بطريقة مش كويسه انا كنت هكله بسناني وقطعوه بضوافري



محمد مرسي ده دكتور محترم وراجل عنده أولاد تخيلوا كده نفسيت أولاده أيه وهما شيفين الشعب كله نازل تريقه عليه 
نفسيت بنته أيه احنا عملين نتريق على لبساها وشكلها 
مراته معنويتها ايه واحنا بنسخر من خمارها وطريقة كلامها وشكلها 
عيب أوى اللى بيحصل ده واللى منرضهوش لنفسنا منرضهوش لغيرنا 
انا محبش حد يتكلم عليا ولا على ابويا ولا على أمي كده 
ولا احنا خلاص أتعودنا ان مرات الريس لازم تبقى مبينا البروكه بتاعتها علينا  والجيب لازم تبقى فوق الركبه وولاد الريس يبقى لابسين أحسن لبس واغلى لبس والريس شخصيا يبقى لابس بدله بألف الدولارات بالنسبه للاخوت اللى أتريقت على الكرافت بتاعت الرئيس وقالت هو رايح يعزى الكرافت دي هو جيبها من تعبه وشقاه مش من فلوسنا ودمنا أحنا أحترم لبسوه اللى مش عجبك عشان قدام هو يحترمك ويوفرلك اللى تقدري تلبسي بيه احسن منه وأفتكري الرسول صلى الله عليه وسلم كان بيلبس أيه 
والناس اللى أتريقت على شكل ولبس زوجة الرئيس أحب أقولكو هذه ملابس يحبها الله ورسوله والخلقه دى خلقها ربنا أتعيبونا الخلق ام الخالق بجد الله المستعان عليكو ومش معنى كلام ده ان انا كده أبقى أخوانجيه انا أنتخبت صباحي في الجوله الاولى ومازلت بتمناه رئيس لكن أرادت ربنا فوق كل شيئ ومش ممكن اللى مش عجبكوا شكلو ده هو اللى يصلح انا قولت ما يمليه عليا ضميري قدام ربنا ولا أخاف في قول الحق لومت لائم ومتقولليش أنتى جبتى الكلام ده منين ميغركوش اللسعان اللى انا فيه انا ساعات بيطلع مني شويه كلام زى الفل ههههههههههه^_^

25 اراء تهم احيا بحبك:

احمد توفيق يقول...

و لو انك هربتى من البوستات الادبية و المشاعر و الاحاسيس و كده و دخلتينا فى حوار سياسة دماغنا جابت اخرها معاه ... لكن برضو قطعتى قلبى يا بنوته فى حوار ان د.مرسى عنده اولاد نفسيتهم تعبانة من التريقة يا عينى ... هههههههه و النبى عثل هههه .. بوست خفيف و ممتع .. تحياتى :)

مصطفى سيف الدين يقول...

نختلف و نتفق مع مرسي سياسيا و فكريا لكن ليس من حقنا ان نخوض في الحديث و نتعدى حدود الأدب
الحرية يجب ان تتقيد عندما تتعدى خصوصيات الآخرين
تحياتي

rona ali يقول...

لا فعلا كلام زى الفل وفل الفل
مفتقداكى يا منونه والله
بيجد يارب تتحسنى انا سيباكى علشان ترتاحى خالص متفكرنيشي ناسيه
عودا لمرسي بصي يا منه الموضوع المفترض ميتخطاش النقد الايجابي
لكن التريقه ونجيب بقي عايلته ونتريق وكده انا مش مع كده خالص طبعا
ولو انى مع النقد الكوميدى اللى وراه هدف فهمانى هههههههههه
اول مرة احس انى مش عارفه اوصل كلامى يلا خير

ahmed يقول...

متفق جدا مع موقفك ده

علشان انا كمان مس اخوانجى ولا بحبهم اصلا..

بس بصراحه انا فرحان جدا ان اول مره احس ان الرئيس وزوجته زينا او شبهنا يعنى زى معظم الناس اللى ماشيين فى الشارع واتمنى انهم ميتغيروش عن كده...

Śђąžล ฬąђ٤єĐ ♥ يقول...

حمد الله ع السلامه الاول :)

وبعدين بقا احنا المصريين مفيش حاجه بتعجبنا أبدا ولا بترضينا

الحرامي اللي كان سارق فلوسنا مش عاجبنا
والراجل اللي على قد ظروفه بردو مش عاجبنا

ده طبعنا .. ومعتقدش انه ابدا هيتغير

مع اختلافي بردو مع الاخوان ومع مرسي
واحترامي لرأيك
هي فعلا صفقه مع المجلس العسكري
عشان مصلحتهم هما وبس

نورتي بقا
ومستنيين اللي جاي :)

حنين محمد يقول...

مساء الغاردينيا منمونتي
انتي اصلا عسل واي كلام تقوليه عسل زيك
بجد اختلاف المصريين مع مرسي نفسه كاررئيس
ولانه من جماعة الاخوان ومواقفهم التي تحسب عليهم
مايديش الحق اننا نتكلم عن مرسي شخصياً كشكله او لبس مراته
وعسى ان تكرهوا شيئاً وهو خيراً لكم
ماتعرفيش بكرة يحصل ايه؟
ربنا بحفظ مصروشعبها "
؛؛
؛
لروحك عبق الغاردينيا
كانت هنا
Reemaas

Unknown يقول...

بتفق معاكي يا منه جداً

و بحيكي على البوست :)

تحياتي الخالصه لكي

Imane Belâbbes يقول...

الله ينور عليكي و الله
انا كمان مبحبش الاخوان خااااااالص
و فرحت زيك عشان مصر بقى رئيسها مش شفيق مش عشان مرسي بالذات
لكن قرفت اوي من الناس اللي قاعدة تشتم مراته و بنته و بساطتهم و لبسهم ، قال إيه مش منظر رئيس مصر
طب و هو لا اللي بيسرق عشان يلبسلكو عاجب و لا اللي مبيرضاش الا لقمة حلال عاجب ؟
الخلاف مع الاخوان واضح يعني و انا من اكتر الناس اللي بتقطعهم معارضة لكن لما حد يتكلم عن ابويا او امي او عني بالشكل دة و ليه ؟ عشان انا شريفة
لا يبقى هروحه عند جد جده القبر :D

سلامي

Emtiaz Zourob يقول...

لازم الواحد يكون راقي في اختلافه ولا ينزل لمستويات دنيا مثل البعض ..

فالاختلاف مع د. مرسي هو اختلاف سياسي واختلاف في وجهات النظر .. ولاداعي للشتايم وقلة الذوق والأدب في التعامل معه أو مع عائلته ..

فعلا بيطلع منك كلام زي الفل :)

Unknown يقول...

احمد توفيق...

هههههههه ماشي يا أحمد انت بتتريق ^_^ عموما بردو مبسوطه أنك جيت وقريت

Unknown يقول...

مصطفى سيف الدين....

بالظبط كده حريتنا لازم تتقيد عندما تتعلق بخصوصيات الاخرين رايك فعلا صواب

Unknown يقول...

rona ali...

انا كويسه يا قلبي ومتقلقيش عليا انا زى الفل بردو هههههههههه
وفهمت قصدك جدا يعنى أحنا ممكن ننقض اوى نضحك على رأي أتقال موقف أتعمل واحنا معترضين عليه مفيهاش حاجه لو انتقدناه نقض كوميدي لكن انها توصل للبس وأوى شكل او اهل دى بقى يبقى قلة ادب وملوش اى علاقة بالنقد

Unknown يقول...

ahmed....

طبعا يا احمد كلنا فرحنا لانه مننا ويشبهنا وبيعب عننا عن الطبقة المتوسطه عامة الشعب يعني هيحس بينا وهيفهمنا منورني ديما يا احمد

Unknown يقول...

Śђąžล ฬąђ٤єĐ ♥...

الله يسلمك يا شذا يا قمر

وفعلا كده احان شعب مش عجبه حاجه خالص

عملين كده زى خالف تعرف

Unknown يقول...

ريـــمـــاس....

انا عسل ده انتي الخليه بتاعت النحل نفسها ملكة الخليه كمان يا قلبي ربنا يخليكي ليا وربنا يسمع من بوءك ويحفظ مصر وشعبها

Unknown يقول...

شيرين سامي...

متشكرة جدا يا دكتوره

وانا فعلا سعيده اننا

متفقين في حاجه حتى لو كانت

بخصوص الأخوان أو مرسي ^_^

Unknown يقول...

إيمي...........

ميرسي يا أيمي يا قمر وابقى خديني معاك بقى وانتى رايحه هههههههههه ^_^

EMA يقول...

و الله يا منون دا كلام زى الفل فعلا

عندك حق و الله و بعدين هو احنا و لا كدة عاجبنا و لا كدة عاجبنا عمالين نتريق و خلاص و لا اللى ناهبنا عاجب و لا اللى ماخدش منا حاجة عاجب دا احنا حالتنا بلا يا شيخة هههههههههههه

سبحان الله المفروض فعلا مانتريقش على حد و بعدين ايه دخلنا بمراته و لا ولاده احنا اللى لنا هو الرئيس طالما هما يعني ماعملوش حاجة تعيبهم..مازلنا برده منجذبين للمظاهر و بس مفيش فايدة لما نتغير احنا بطريقة تفكيرنا و حكمنا على الأمور يبقى نستنى نحكم و يبقى من حقنا نعترض و نحاكم اي ظالم



تحياتي منون

عمرو يسرى يقول...

انا قرات كتير ان فى ناس بتتريق على عائلته وزوجته بس لحد دلوقتى ماقرات اى حاجه بتسخر من عائلته وديه فى حد ذاتها حاجه غريبه مش عارف ليه ربنا بيخلينى اشوف غضب الناس من الناس للى بتسخر وما شوفش حد بيسخر سبحانه اتفق معاكى فى الغضب ممن يسخر من عائلته
ولكن اختلف معاكى فى الفرحه بنجاحه لانى مافرحتش لما كسب لانه نجح هو نجح شفيق كله محصل بعضه وهو ان الثوره باى باى
تحياتى

Bent Men ElZman Da !! يقول...

انا بردو مش بطيق الاخوان صراحه من اى اتجاه يعنى
بس كل اللى نقدر نعمله اننا نحاول نتغاضى "مؤقتا" عن كل الحاجات اللى حصلت قبل كده ونكون وراه كرئيس لحد ما نشوف هنوصل لايه
لو اصلح يبقى لينا ولو اسوء يبقى عليه ان شاء الله :D

معاكى ومعترضه جدا على التريقه وخصوصا على اهل بيته
الاختلاف مش معناه اننا نتعرض لاهله بالسيئه
بالعكس احنا المفروض نكون مبسوطين ان زوجه رئيس مصر لبسها محترم وشخصيه محترمه

اتكلمتى فى موضوع مهم اوووى يا منه

Menna يقول...

جميل كلامة و طريقة تفكيرك يا منونة
الناس افتكرت لاننا كنا بنتريق على مبارك و عيلته ان ده بقى مباح على الجميع خلاص
احنا كنا بنعمل اللي على مزاجنا في مبارك ببساطة لانه مجرم
و احنا كنا بنقتص منه بطريقتن ساعتها مفرقش معانا سنه ولا مكانته لانه بقى في نظرنا اوضع من اقل واحد فينا
دلوقتي بقى انا مش عاجبني حال الاتنين سواء اللي بيتريق على د.مرسي لانه مش بيحبه وخلاص
و قاعدله على الواحدة في حاجات تافهة
واللي عمال يسقف عمال على بطال في حاجات تانية اتفه
يعني انا ميفرقش معايا هو قعد على يمين و لا شمال المشير اد ما يفرق معايا هو كان بيتفق معاه على ايه و يا ترى اللي اتفقوا عليه ده في صالحنا ولا لا
ميفرقش معايا بيصلي الفجر ولا لا دي حاجة بينه وبين ربنا سبحانه وتعالى اد ما يفرق معايا انه حيتقى الله في قراراته ويراعي ربنا فيها
ميفرقش معايا مراته وبنته شكلهم ايه اد ما يفرق معايا ان مصر متتحولش عزبة في يوم ما لاهله وعيلته او جماعته
انا ميفرقش معايا انه يسلم على اهالي الشهدا اد ما يفرق معايا انه يقتص لدم الشهدا دول
انا لا حسقف ولا حتريق
انا لازم انقد بعقل
تحياتي لمقالك الرائع وافكارك الجميلة :)

Unknown يقول...

EMA EMA....

انتى اللى زى الفل يا قمر

احنا شعب متناقض وبناقض نفسنا طول الوقت

Unknown يقول...

عمرو يسرى....

تفاؤل ولا تتشائم يا عمرو

وان شاء الله ربنا يصلح الحال

Unknown يقول...

Bent Men ElZman Da !!....


المهم انك نورتينى يا دوندون

Unknown يقول...

Menna....


نورتينى جدا واسعدنى جدا تواجدك عندى

اللى بكتبو هنا بتاعتى انا وبس وبقلمى و اى حاجه مش انااللى كتباها بقول مين كتبها وده نادرلمايحصل. يتم التشغيل بواسطة Blogger.